ദുശ്ശകുന പേടി; ഒടുവിൽ 13ാം നമ്പര്‍ സ്റ്റേറ്റ് കാര്‍ മന്ത്രി പി. പ്രസാദ് ഏറ്റെടുത്തു; മറ്റു മന്ത്രിമാരുടെ വസതിയും വാഹനങ്ങൾക്ക്​ നമ്പരും ഇങ്ങിനെ... | Kerala Ministers





തിരുവനന്തപുരം: ഏതൊരു മന്ത്രിസഭ കേരളത്തില്‍ അധികാരത്തിലെത്തിയാലും അടുത്ത ദിവസത്തെ പതിവു വാര്‍ത്തകളിലൊന്നാണ് പതിമൂന്നാം നമ്പര്‍ കാറിന്റെയും മന്‍മോഹന്‍ ബംഗ്ലാവിന്റേയും വിശേഷം. ഇത്തവണയും അതു തെറ്റിക്കുന്നില്ല. പിണറായി സര്‍ക്കാര്‍ 2.0യില്‍ പതിമൂന്നാം നമ്പര്‍ കാര്‍ ഇത്തവണയും ആലപ്പുഴ റൂട്ടില്‍ തന്നെ ഓടും. ചേര്‍ത്തലയില്‍ നിന്നുള്ള സിപിഐ പ്രതിനിധിയും കൃഷിമന്ത്രിയുമായ പി പ്രസാദിനാണ് ഇത്തവണ പതിമൂന്നാം നമ്പര്‍ കാര്‍.

മന്ത്രിമാര്‍ വാഴില്ലെന്ന വിശ്വസം നിലനില്‍ക്കുന്ന മന്‍മോഹന്‍ ബംഗ്ലാവിനും പുതിയ അവകാശി വന്നു. തിരുവനന്തപുരത്തു നിന്നു വിജയിച്ച ആന്റണി രാജുവാണ് ഇത്തവണ ഈ ബംഗ്‌ളാവില്‍ പാര്‍ക്കുക.

പതിമൂന്നാം നമ്പര്‍ കാറിന്റെ ചിത്രം പങ്കുവെച്ച് മുന്‍ ധനമന്ത്രി തോമസ് ഐസക് ഫേസ്ബുക്കില്‍ ' അവസാനം പതിമൂന്നാം നമ്പര്‍ കാര്‍ കിട്ടി' എന്ന പോസ്‌ററ് ഇട്ടത് 2016 ജൂണ്‍ 9നായിരുന്നു. അഞ്ചുവര്‍ഷം കഴിഞ്ഞു. ഭരണത്തുടര്‍ച്ച കിട്ടിയതു പോലെ പതിമൂന്നാം നമ്പര്‍ കാറിനും പിന്തുടച്ചാവകാശിയെ കിട്ടി. തിരഞ്ഞെടുപ്പു കഴിഞ്ഞപ്പോള്‍ രാഷ്ട്രീയകക്ഷി മാറിയെന്നു മാത്രം .സിപിഎമ്മില്‍ നിന്ന് സിപിഐയിലേക്ക്.

പുറത്തുവന്ന ലിസ്റ്റനുസരിച്ച് മന്ത്രിമാരുടെ കാറുകളുടെ നമ്പര്‍ ഇങ്ങനെയാണ്

മുഖ്യമന്ത്രി -1 കെ.രാജന്‍ -2 റോഷി അഗസ്റ്റിന്‍ -3 കെ.കൃഷ്ണന്‍ കുട്ടി -4 എ.കെ.ശശീന്ദ്രന്‍ -5 അഹമ്മദ് ദേവര്‍കോവില്‍- 6 ആന്റണി രാജു-7 സജിചെറിയാന്‍ -8 എം വി ഗോവിന്ദന്‍ -9 കെ.എന്‍.ബാലഗോപാല്‍ -10 പി.രാജീവ് -11 വി.എന്‍.വാസവന്‍ -12 പി.പ്രസാദ് -13 ജെ.ചിഞ്ചുറാണി -14 കെ.രാധാകൃഷ്ണന്‍ -15 വി.ശിവന്‍കുട്ടി -16 പി എ മുഹമ്മദ് റിയാസ് -17 പ്രൊഫ ആര്‍.ബിന്ദു -18 ജി.ആര്‍.അനില്‍-19 വീണാ ജോര്‍ജ് -20 വി. അബ്ദുറഹിമാന്‍ -21

അശുഭകരമെന്ന് മുദ്രയടിച്ച പതിമൂന്നാം നമ്പര്‍ കാര്‍ ആരും സ്വീകരിക്കാതിരുന്നത് പിണറായി ഒന്നാം സര്‍ക്കാരില്‍ മന്ത്രിമാരുടെ സത്യപ്രതിജ്ഞയ്ക്ക് ശേഷം വലിയ വിവാദമായിരുന്നു. തുടര്‍ന്നാണ് അത് സ്വീകരിക്കാന്‍ തോമസ് ഐസക്കും, വി എസ് സുനില്‍കുമാറും എത്തിയത്. പക്ഷേ അലോട്ട് ചെയ്തു കിട്ടിയത് തോമസ് ഐസക്കിന്. മന്ത്രിമാര്‍ വാഴില്ലെന്ന വിശ്വസം നിലനില്‍ക്കുന്ന മന്‍മോഹന്‍ ബംഗ്ലാവും വെല്ലുവിളിയോടെ തോമസ് ഐസക്ക് ഏറ്റെടുത്തിരുന്നു. അതെന്തായാലും പിണറായി 2.0യില്‍ ഐസക് ഇല്ല.

മുന്‍ എല്‍.ഡി.എഫ് സര്‍ക്കാരിന്റെ കാലത്ത് എം.എ ബേബിയാണ് പതിമൂന്നാം നമ്പര്‍ കാര്‍ ഉപയോഗിച്ചിരുന്നത്. അടുത്ത തിരഞ്ഞെടുപ്പിലും പക്ഷേ എം എ ബേബി കുണ്ടറയില്‍ വിജയശ്രീലാളിതനായെങ്കിലും മന്ത്രിപദവി പോയി. പിന്നീട് 2011ല്‍ വന്ന യു.ഡി.എഫ് സര്‍ക്കാരാണ് പതിമൂന്നാം നമ്പര്‍ കാര്‍ ഉപേക്ഷിച്ചത്.

ഒന്നാം നമ്പര്‍ കാര്‍ മുഖ്യമന്ത്രിയുടേതാണ്. രണ്ടാം നമ്പര്‍ കഴിഞ്ഞ തവണ റവന്യൂ മന്ത്രിയായിരുന്ന സി.പി.ഐയുടെ ഇ.ചന്ദ്രശേഖരനായിരുന്നു. ഇക്കുറിയും രണ്ടാം നമ്പര്‍ സി.പി.ഐ മന്ത്രിക്ക് തന്നെ. കെ രാജന് .

19 ഇന്നോവ ക്രിസ്റ്റയും രണ്ടു ഇന്നോവയുമാണ് പുതിയ മന്ത്രിമാര്‍ക്കായി ഒരുങ്ങുന്നത്. എല്ലാവര്‍ക്കും ഇന്നോവ ക്രിസ്റ്റ കാര്‍ തന്നെ നല്‍കാനാണ് ടൂറിസം വകുപ്പിന്റെ തീരുമാനം. 19 പേര്‍ക്കും പുതിയ മോഡലായ ഇന്നോവ ക്രിസ്റ്റ തന്നെ നല്‍കും. രണ്ടു പേര്‍ക്ക് പഴയ മോഡലും. പുതിയ ക്രിസ്റ്റ വരുന്ന മുറയ്ക്ക് അത് മാറ്റി നല്‍കും.

വസതിയുടെ കാര്യത്തിലും അന്ധവിശ്വാസം നിലനില്‍ക്കുന്നുണ്ട്. മന്‍മോഹന്‍ ബംഗ്‌ളാവില്‍ താമസിച്ചവര്‍ക്ക് ഭരണം സുഗമമാവില്ലെന്നതാണത്. ഈ വെല്ലുവിളി സ്വീകരിച്ചാണ് കഴിഞ്ഞ സര്‍ക്കാരില്‍ ഡോ. തോമസ് ഐസക് വസതി ഏറ്റെടുത്തത്. ഇത്തവണ തിരുവനന്തപുരം എംഎല്‍എയും ഗതാഗത മന്ത്രിയുമായ ആന്റണി രാജു തന്നെ അത് തിരഞ്ഞെടുത്തു.

മന്‍മോഹന്‍ ബംഗ്‌ളാവ്
മന്ത്രിമാരും വസതികളും

1. പിണറായി വിജയന്‍- ക്്‌ളിഫ് ഹൗസ് , നന്ദന്‍കോട്

2. കെ രാജന്‍- ഗ്രേസ്, കന്റോണ്‍മെന്റ് ഹൗസിനു സമീപം, പാളയം

3. റോഷി അഗസ്റ്റിന്‍, പ്രശാന്ത് , ക്ലിഫ് ഹൗസ് കോമ്പൗണ്ട്, നന്ദന്‍കോട്

4. കെ കൃഷ്ണന്‍കുട്ടി, പെരിയാര്‍, ക്ലിഫ് ഹൗസ് കോമ്പൗണ്ട്, നന്ദന്‍കോട്

5. എ.കെ.ശശീന്ദ്രന്‍ - കാവേരി, കന്റോണ്‍മെന്റ് ഹൗസിനു സമീപം, പാളയം

6. അഹമ്മദ് ദേവര്‍കോവില്‍-തൈക്കാട് ഹൗസ് , വഴുതയ്ക്കാട്

7. ആന്റണി രാജു-മന്‍മോഹന്‍ ബംഗ്‌ളാവ്, വെള്ളയമ്പലം

8. സജി ചെറിയാന്‍ -കവടിയാര്‍ ഹൗസ്, വെള്ളയമ്പലം

9. എം വി ഗോവിന്ദന്‍ -നെസ്റ്റ്, ക്ലിഫ് ഹൗസ് കോമ്പൗണ്ട്, നന്ദന്‍കോട്

10. കെ.എന്‍.ബാലഗോപാല്‍ -പൗര്‍ണ്ണമി, ക്ലിഫ് ഹൗസ് കോമ്പൗണ്ട്, നന്ദന്‍കോട്

11. പി.രാജീവ് -ഉഷസ്സ് ,നന്ദന്‍കോട്

12. വി.എന്‍.വാസവന്‍ -ഗംഗ, കന്റോണ്‍മെന്റ് ഹൗസിനു സമീപം, പാളയം

13. പി.പ്രസാദ് -ലിന്‍ഹേര്‍സ്റ്റ്, ദേവസ്വം ബോര്‍ഡ് ജംഗ്ഷന്‍, നന്ദന്‍കോട്.

14. ജെ.ചിഞ്ചുറാണി - അശോക, ക്ലിഫ് ഹൗസ് കോമ്പൗണ്ട്, നന്ദന്‍കോട്

15. കെ.രാധാകൃഷ്ണന്‍ -എസ്സെന്‍ഡെന്‍, ക്ലിഫ് ഹൗസ് കോമ്പൗണ്ട്, നന്ദന്‍കോട്

16. വി.ശിവന്‍കുട്ടി -റോസ് ഹൗസ്, വഴുതയ്ക്കാട്

17. പി എ മുഹമ്മദ് റിയാസ് -പമ്പ, ക്ലിഫ് ഹൗസ് കോമ്പൗണ്ട്, നന്ദന്‍കോട്

18. പ്രൊഫ ആര്‍.ബിന്ദു -സാനഡു, വഴുതയ്ക്കാട്

19. ജി.ആര്‍.അനില്‍-അജന്ത, വെളളയമ്പലം

20. വീണാ ജോര്‍ജ് -നിള, കന്റോണ്‍മെന്റ് ഹൗസിനു സമീപം, പാളയം

Post a Comment

Previous Post Next Post

വാർത്തകൾ ഉടനടി മൊബൈലിൽ ലഭിക്കാൻ ഇവിടെ ക്ലിക്ക് ചെയ്യൂ

കമന്റ് ബോക്‌സിലെ അഭിപ്രായങ്ങള്‍ റിപ്പബ്ലിക്ക് ഡെയ്ലിയുടേതല്ല.
വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത,
സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി
നയപ്രകാരം ശിക്ഷാര്‍ഹമാണ്.