കേരളത്തിലെ ഉന്നതവിദ്യഭ്യാസരംഗ ആഗോള മികവിലേക്കുയരണം: എസ്.എസ്.എഫ് പ്രൊഫ്‌സമ്മിറ്റ്


എസ് എസ് എഫ് പ്രൊഫ്സമ്മിറ്റ് സമാപന സെഷന്‍ ഉദ്ഘാടനം സയ്യിദ് ഇബ്രാഹീമുല്‍ ഖലീല്‍ ബുഖാരി കടലുണ്ടി നിര്‍വ്വഹിക്കുന്നു..

കോഴിക്കോട്: കേരളത്തിലെ ഉന്നതവിദ്യഭ്യാസരംഗം ഏറെ നിരാശപ്പെടുത്തുന്നുവെന്നും മികച്ച നിലവാരത്തിലേക്ക് ഉന്നതവിദ്യഭ്യാസ മേഖലയെ ഉയര്‍ത്തിക്കൊണ്ടുവരാനുള്ള പദ്ധതികള്‍ അടിയന്തിര പ്രാധാന്യത്തോടെ കൈകൊള്ളണമെന്നും എസ് എസ് എഫ് പ്രൊഫ്‌സമ്മിറ്റ്, പ്രൊഫഷണല്‍ വിദ്യാര്‍ത്ഥി സമ്മേളനം ആവശ്യപ്പെട്ടു.

യൂനിവേഴ്‌സിറ്റി, കോളേജ്, എഞ്ചിനീയറിംഗ്, ലോ, ഡെന്റല്‍ തുടങ്ങിയ വ്യത്യസ്ത വിഭാഗങ്ങളില്‍ രാജ്യത്തെ വിദ്യഭ്യാസ സ്ഥാപനങ്ങളുടെ മികവിന്റെ അടിസ്ഥാനത്തിലുള്ള റാങ്കിംഗ് പട്ടിക കേന്ദ്ര മാനവ വിഭവശേഷി മന്ത്രാലയം കഴിഞ്ഞ വര്‍ഷം പ്രസിദ്ധീകരിച്ചിരുന്നു. വ്യത്യസ്ത വിഭാഗങ്ങളില്‍ കേരളത്തില്‍ നിന്ന് പട്ടികയുടെ ആദ്യ പത്തില്‍ ഇടം പിടിച്ചത് ഒരു സ്ഥാപനം മാത്രമാണ്. ഉന്നതവിദ്യഭ്യാസരംഗം കൈകാര്യം ചെയ്യാനായി വകുപ്പ് മന്ത്രിയുള്ള സംസ്ഥാനമാണ് നമ്മുടേത്. ആ സാധ്യതയെ കൃത്യമായ ആസൂത്രണങ്ങളോടെ ഉപയോഗപ്പെടുത്താന്‍ നമുക്കാകണം. ഇതിനായി ലോകത്തെ മുന്‍നിര സര്‍വകലാശാലകളിലെ രീതികള്‍ പഠിച്ച് മാതൃകായോഗ്യമായവ സ്വീകരിക്കേണ്ടതുണ്ട്. മികച്ച അക്കാഡമിക് അന്തരീക്ഷം ലഭിക്കുന്നതിന് കേരളത്തിന് പുറത്തേക്ക് പോകാന്‍ വിദ്യാര്‍ത്ഥികള്‍ നിര്‍ബന്ധിതരാകുന്ന അവസ്ഥ ഗൗരവമായി കാണേണ്ടതുണ്ടെന്നും സമ്മേളനം ചൂണ്ടിക്കാട്ടി.

വിദ്യാര്‍ത്ഥി സൗഹൃദമായ പദ്ധതികളിലൂടെ കേരളത്തിന്റെ ഉന്നതവിദ്യഭ്യാസരംഗത്തെ നിലവാരം മികച്ചതാക്കാന്‍ കഴിയുമെന്നും പ്രമേയം പറഞ്ഞു. എസ് എസ്എഫ് സംസ്ഥാന കാമ്പസ് സെക്രട്ടറി ഡോ: അബൂബക്കര്‍ കാടാമ്പുഴ പ്രമേയം അവതരിപ്പിച്ചു.

മൂന്ന് ദിവസം നീണ്ടുനിന്ന പ്രൊഫ്‌സമ്മിറ്റില്‍ രാജ്യത്തെ വ്യത്യസ്ത കാമ്പസുകളില്‍ നിന്നായി പ്രൊഫഷണല്‍ കോഴ്‌സ് ചെയ്യുന്ന മുന്‍കൂട്ടി രജിസ്റ്റര്‍ ചെയ്ത അയ്യായിരത്തിലധികം വിദ്യാര്‍ത്ഥികള്‍ പ്രതിനിധികളായിരുന്നു. എസ് എസ് എഫ് സംസ്ഥാന കമ്മിറ്റി പതിനാല് വര്‍ഷമായി നടത്തി കൊണ്ടിരിക്കുന്ന പ്രൊഫഷണല്‍ വിദ്യാര്‍ത്ഥികളുടെ കോണ്‍ഫറന്‍സ് കോവിഡ് പശ്ചാതലത്തില്‍ ഈ വര്‍ഷം ഓണ്‍ലൈനിലാണ് സംഘടിപ്പിച്ചത്. മതം, രാഷ്ട്രീയം, സാമൂഹികം, പഠനം, കരിയര്‍, കല തുടങ്ങിയ വിവിധ സെഷനുകള്‍ക്ക് പണ്ഡിതരും, വിദ്യാഭ്യാസ വിചക്ഷണരും നേതൃത്വം നല്‍കി. സമാപന സമ്മേളനം കേരള മുസ്ലിം ജമാഅത്ത് സംസ്ഥാന ജനറല്‍ സെക്രട്ടറി സയ്യിദ് ഇബ്രാഹീമുല്‍ ഖലീല്‍ അല്‍ ബുഖാരി കടലുണ്ടി ഉദ്ഘാടനം ചെയ്തു. എസ് എസ് എഫ് സംസ്ഥാന പ്രസിഡണ്ട് കെ വൈ നിസാമുദ്ധീന്‍ ഫാളിലി, സംസ്ഥാന സെക്രട്ടറിയേറ്റ് അംഗം സയ്യിദ് മുനീര്‍ അല്‍ അഹ്ദല്‍ കാസര്‍ക്കോട് എന്നിവര്‍ സംസാരിച്ചു.

വിവിധ സെഷനുകള്‍ക്ക് ദേവര്‍ഷോല അബ്ദുസ്സലാം മുസ്ലിയാര്‍,ഡോ. പി എ മുഹമ്മദ് ഫാറൂഖ് നഈമി അല്‍ ബുഖാരി, എം. അബ്ദുല്‍ മജീദ് അരിയല്ലൂര്‍, ശഫീഖ് ബുഖാരി, ഡോ. നൂറുദ്ധീന്‍ റാസി എന്നിവര്‍ നേതൃത്വം നല്‍കി.

Post a Comment

Previous Post Next Post

വാർത്തകൾ ഉടനടി മൊബൈലിൽ ലഭിക്കാൻ ഇവിടെ ക്ലിക്ക് ചെയ്യൂ

കമന്റ് ബോക്‌സിലെ അഭിപ്രായങ്ങള്‍ റിപ്പബ്ലിക്ക് ഡെയ്ലിയുടേതല്ല.
വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത,
സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി
നയപ്രകാരം ശിക്ഷാര്‍ഹമാണ്.